ឯកឧត្ដម​ អុិត​ ដារ៉ា​ ឧបត្ថម្ភ​កុំព្យូទ័រ ២០គ្រឿង​ ដល់ស្នង​ការរដ្ឋាន​នគរបាល​ខេត្ត​បន្ទាយមានជ័យ​

បន្ទាយមានជ័យ ៖ ដើម្បីរួមចំណែក ក្នុងការបម្រើផលប្រយោជន៍ជូនប្រជាពលរដ្ឋ ក៏ដូចជាសម្រួលដល់ការងាររដ្ឋបាលរបស់មន្ត្រីនគរបាលខេត្តបន្ទាយមានជ័យ ឯកឧត្ដម​ អុិត​ ដារ៉ា​ អនុរដ្ឋលេខាធិការ​នៃ​លេខាធិការ​រដ្ឋា​នកិច្ច​ការព្រំដែន បានឧបត្ថម្ភកុំព្យូទ័រយួរដៃ ចំនួន២០គ្រឿង ដល់ស្នងការដ្ឋាននគរបាលខេត្តបន្ទាយមានជ័យ ។

ការឧបត្ថម្ភអំណោយកុំព្យូទ័រយួរដៃខាងលើ ប្រព្រឹត្តទៅកាលពីថ្ងៃ​​ទី២៤ ខែវិច្ឆិកា​​ ឆ្នាំ២០២៣ នៅស្នងការដ្ឋាននគរបាលខេត្តបន្ទាយ ក្រោមការទទួលស្វាគមន៍ពីសំណាក់លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ និងថ្នាក់ដឹកនាំស្នងការដ្ឋាន ចំនួន០៧នាក់ទៀតផងដែរ ។

ក្នុងពិធីនេះ ឯកឧត្ដម​ អុិត​ ដារ៉ា​ បានមានប្រសាសន៍ សំណេះសំណាល សួរសុខទុក្ខដល់ថ្នាក់ដឹកនាំស្នងការដ្ឋាននគរបាលខេត្តបន្ទាយមានជ័យ និងបានបង្ហាញពីក្តីសង្ឃឹមថា អំណោយដែលឯកឧត្ដមបានឧបត្ថម្ភនាពេលនេះ នឹងបានរួមចំណែកក្នុងការបម្រើផលប្រយោជន៍ជូនប្រជាពលរដ្ឋ ក៏ដូចជាសម្រួលដល់ការងាររដ្ឋបាល របស់កងកម្លាំងជាក់ជាមិនខាន ។

ជាការឆ្លើយតប លោកឧត្តមសេនីយ៍ទោ សិទ្ធិ ឡោះ បានថ្លែងអំណរគុណយ៉ាងជ្រាលជ្រៅ ដល់ ឯកឧត្តម អុិត​ ដារ៉ា​ អនុរដ្ឋលេខាធិការ​នៃ​លេខាធិការ​រដ្ឋា​នកិច្ច​ការព្រំដែន​ ដែល​បាន​ឧបត្ថម្ភ​កុំព្យូទ័រដល់ស្នងការដ្ឋាននគរបាលខេត្តបន្ទាយមានជ័យ សម្រាប់ប្រេី​ប្រាស់​បំពេញ​ការងារក្នុង​ការិយាល័យ​ ។

លោកឧត្តម​សេនីយ៍​ទោស្នងការ ក៏បានជូនពរដល់​ឯកឧត្ដម​ និងសប្បុរសជន​ទាំង​អស់​ សូមប្រកបដោយ ពុទ្ធពរទាំង៤ប្រការ គឺ អាយុ វណ្ណ: សុខ: ពល: កុំបីឃ្លៀងឃ្លាតឡើយ ៕